Omkar Sood – Garmi aayi

ਗਰਮੀ ਆਈ

ਗਰਮੀ ਆਈ-ਗਰਮੀ ਆਈ।
ਕਿੰਨੀ ਭੈੜੀ ਗਰਮੀ ਆਈ।

ਸੂਰਜ ਗੋਲਾ ਅੱਗ ਵਰ੍ਹਾਉਂਦਾ।
ਲੋਕਾਂ ਉੱਤੇ ਕਹਿਰ ਕਮਾਉਂਦਾ।
ਲੋਕੀਂ ਪਾਉਂਦੇ ਹਾਲ-ਦੁਹਾਈ,
ਗਰਮੀ ਆਈ…………!

ਮੱਛਰ ਕੰਨੀਂ ਰਾਗ ਸੁਣਾਉਂਦਾ।
ਫਨੀਅਰ ਵਾਂਗੂੰ ਡੰਗ ਚਲਾਉਂਦਾ।
ਇਸਨੇ ਸਭ ਦੀ ਨੀਂਦ ਉਡਾਈ,
ਗਰਮੀ ਆਈ…………!

ਮਈ-ਜੂਨ-ਜੁਲਾਈ ਕਹਿਰ।
ਗਰਮੀ ਉਗਲੇ ਪੂਰਾ ਜ਼ਹਿਰ।
ਅਗਸਤ ਵੀ ਇਨ੍ਹਾਂ ਦਾ ਹੀ ਭਾਈ,
ਗਰਮੀ ਆਈ…………!

ਠੰਡੇ ਸ਼ਰਬਤ ਮਨ ਨੂੰ ਭਾਉਂਦੇ।
ਕੋਕਾ-ਪੈਪਸੀ ਚੇਤੇ ਆਉਂਦੇ।
ਲੱਸੀ ਦੇ ਵਿੱਚ ਜਾਨ ਸਮਾਈ,
ਗਰਮੀ ਆਈ…………!

ਪਸ਼ੂ-ਪਰਿੰਦੇ ਸਾਰੇ ਜੀਵ।
ਸਭ ਦੀ ਲਮਕੀ ਜਾਵੇ ਜੀਭ।
ਭੰਡਣ ਸਾਰੇ ਰੁੱਤ ਕਸਾਈ,
ਗਰਮੀ ਆਈ…………!

ਬਿਜਲੀ ਲਾਉਂਦੀ ਅੱਖ-ਮਟੱਕਾ।
ਚਲਦਾ-ਚਲਦਾ ਰੁਕਜੇ ਪੱਖਾ।
ਧੱਤ ਤੇਰੇ ਦੀ ਬਿਜਲੀ ਮਾਈ,
ਗਰਮੀ ਆਈ…………!

ਰੁੱਤਾਂ ਵਿੱਚੋਂ ਰੁੱਤ ਕਪੱਤੀ।
ਸਭ ਦੀ ਜਾਵੇ ਮਾਰੀ ਮੱਤੀ।
ਫਿਰ ਵੀ ਕੁਦਰਤ ਰੁੱਤ ਬਣਾਈ,
ਗਰਮੀ ਆਈ…………!

ਪਾਈ ਜਾਵਣ ਸਾੜ ਜ਼ਮੀਨਾ।
ਚੋਂਦਾ ਪਾਣੀ ਵਾਂਗ ਪਸੀਨਾ।
ਲੂਆਂ ਨੇ ਧਰਤੀ ਗਰਮਾਈ,
ਗਰਮੀ ਆਈ…………!

ਚੰਗੇ-ਮੰਦੇ ਸਾਰੇ ਬੰਦੇ।
ਕਰਦੇ ਫਿਰਦੇ ਆਪਣੇ ਧੰਦੇ।
ਭਾਵੇਂ ਗਰਮੀ ਅੱਤ ਮਚਾਈ,
ਗਰਮੀ ਆਈ…………!