Ajaib Chitrakar – Dabbu kutte

ਡੱਬੂ ਕੁੱਤੇ, ਉੱਡਦੇ,
ਵੱਲ ‘ਸਮਾਨਾਂ ਜਾਵੰਦੇ ।
ਇਹਨਾਂ ਪਿਛੇ ਨੱਸੀਏ,
ਗੀਤ ਇਨ੍ਹਾਂ ਦੇ ਗਾਵੰਦੇ ।

ਡੱਬੂ ਕੁੱਤੇ ਕੂਲੇ ਨੇ,
ਰੇਸ਼ਮ ਦੀਆਂ ਤਾਰਾਂ ਤੋਂ ।
ਡੱਬੂ ਕੁੱਤੇ ਚਿੱਟੇ ਨੇ,
ਚਿੱਟੀਆਂ ਦੁੱਧ ਦੀਆਂ ਧਾਰਾਂ ਤੋਂ ।

ਡੱਬੂ ਕੁੱਤੇ ਸੋਹਣੇ ਨੇ,
ਡੱਬੂ ਕੁੱਤੇ ਪਿਆਰੇ ਨੇ ।
ਦੂਰ ਉਚੇਰੇ ਚਮਕਦੇ,
ਜਿਉਂ ਅਸਮਾਨੀ ਤਾਰੇ ਨੇ ।

ਡੱਬੂ ਕੁੱਤੇ ਡੱਬੂ ਨੇ,
ਕੀ ਰੀਸਾਂ ਨੇ ਇਨ੍ਹਾਂ ਦੀਆਂ ।
ਬਿਨਾਂ ਪਰਾਂ ਤੋਂ ਉੱਡਦੇ,
ਵਾਂਗ ਉਡਾਰੂ ਪੰਛੀਆਂ ।

ਡੱਬੂ ਕੁੱਤੇ ਜੀਣ ਇਹ,
ਸਾਨੂੰ ਰਹਿਣ ਖਿਡਾਵੰਦੇ ।
ਸਾਨੂੰ ਵੀ ਉਚਿਆਣ ਇਹ,
ਆਪ ਉਚੇਰੇ ਜਾਵੰਦੇ ।

(ਅੱਕ ਦੀਆਂ ਕੁਕੜੀਆਂ ਚੋ ਜੋ
ਰੂੰ ਜਿਹੀ ਨਿਕਲਕੇ ਉਪਰ ਨੂੰ
ਉਡਦੀ ਹੈ, ਬੱਚੇ ਉਸਨੂੰ ਡੱਬੂ
ਕੁੱਤੇ ਵੀ ਆਖ ਦਿੰਦੇ ਹਨ)