Sukhwinder Amrit – Asurakhyita

ਅਸੁਰੱਖਿਅਤ
———–

ਔਰਤ ਭਾਲਦੀ ਹੈ ਸੁਰੱਖਿਆ
ਆਪਣੇ ਪਿਤਾ, ਭਾਈ, ਪੁੱਤਰ
ਪਤੀ ਅਤੇ ਪ੍ਰੇਮੀ ਕੋਲੋਂ

ਅੌਰਤ ਡਰਦੀ ਹੈ
ਕਿਸੇ ਦੂਸਰੀ ਅੌਰਤ ਦੇ
ਪਿਤਾ, ਭਾਈ, ਪੁੱਤਰ
ਪਤੀ ਅਤੇ ਪ੍ਰੇਮੀ ਕੋਲੋਂ

ਹੁਣ ਤਾਂ ਹੋਰ ਵੀ ਡਰਾਉਣਾ ਹੋ ਗਿਆ ਹੈ ਪੁਰਸ਼
ਕਿ ਔਰਤ ਡਰਨ ਲੱਗੀ ਹੈ
ਆਪਣੇ ਹੀ ਪਿਤਾ, ਭਾਈ, ਪੁੱਤਰ
ਪਤੀ ਅਤੇ ਪ੍ਰੇਮੀ ਕੋਲੋਂ

ਬੇਸ਼ੱਕ ਮੌਜੂਦ ਨੇ ਦੁਨੀਆਂ ਵਿਚ ਅੱਜ ਵੀ
ਛਾਵਾਂ ਵਰਗੇ ਪਿਤਾ
ਬਾਹਵਾਂ ਵਰਗੇ ਭਾਈ
ਡੰਗੋਰੀਆਂ ਵਰਗੇ ਪੁੱਤਰ
ਢਾਲਾਂ ਵਰਗੇ ਪਤੀ
ਤੇ ਨਿੱਘੀਆਂ ਬੁੱਕਲਾਂ ਵਰਗੇ ਪ੍ਰੇਮੀ

ਫਿਰ ਵੀ ਡਰਨ ਲੱਗੀ ਹੈ ਔਰਤ
ਪੁਰਸ਼ ਦੀ ਹੋਂਦ ਤੋਂ

ਕਿੰਨੀ ਅਸੁਰੱਖਿਅਤ ਹੋ ਗਈ ਹੈ ਔਰਤ !