Omkar Sood – Ajj diwali

ਅੱਜ ਦੀਵਾਲੀ ਆਈ ਕੁਝ ਲਿਆਓ ਪਾਪਾ ਜੀ!
ਲੱਡੂ-ਪੇੜਾ-ਬਰਫੀ ਸਭ ਖਵਾਓ ਪਾਪਾ ਜੀ!!

ਅਸੀਂ ਨਹੀਂ ਬੰਬ ਪਟਾਕੇ ਲੈਣੇ।
ਕਰਦੇ ਧੂਆਂ ਨੇ ਟੁੱਟ ਪੈਣੇ।
ਫਲ ਤੇ ਸੁੱਕੇ ਮੇਵੇ ਘਰੇ ਮੰਗਾਓ ਪਾਪਾ ਜੀ!!

ਕੁਝ ਦੀਵੇ ਕੁਝ ਤੇਲ, ਬੱਤੀਆਂ।
ਕੁਝ ਕੁ ਡੱਬੇ ਮੋਮਬੱਤੀਆਂ-
ਰਾਤੀਂ ਘਰ ਦੇ ਵਿੱਚ ਜਗਾਓ ਪਾਪਾ ਜੀ!!

ਚਾਵਾਂ ਭਰੀ ਦੀਵਾਲੀ ਆਈ।
ਖੁਸ਼ੀਆਂ ਖੇੜੇ ਲੈ ਕੇ ਆਈ।
ਰੰਗ-ਬਰੰਗੇ ਫੁੱਲ ਸਜਾਓ ਪਾਪਾ ਜੀ!!

ਕੁਰਸੀ ਡਾਹ ਕੇ ਬੈਠੀ ਦਾਦੀ।
ਚਿਹਰੇ ‘ਤੇ ਉਦਾਸੀ ਡਾਢੀ!
ਦਾਦੀ ਤਾਈਂ ਹਸਾਓ ਪਾਪਾ ਜੀ!!

ਬਾਬਾ ਜੀ ਨੂੰ ਫੋਨ ਘੁਮਾਓ।
ਛੇਤੀ-ਛੇਤੀ ਘਰ ਨੂੰ ਆਓ।
ਘਰ ਹੀ ਖੁਸ਼ੀ ਮਨਾਓ ਪਾਪਾ ਜੀ!!

ਦਾਰੂ-ਦੱਪਾ ਘਰ ਨਹੀਂ ਵਾੜੋ।
ਜੂਏ ਨੂੰ ਵੀ ਤੁਸੀਂ ਪਛਾੜੋ।
ਬੁਰਾਈਆਂ ਦੂਰ ਭਜਾਓ ਪਾਪਾ ਜੀ!!

ਰਾਤੀਂ ਕੋਠੇ ‘ਤੇ ਚੜ੍ਹ ਜਾਣਾ।
ਰੌਸ਼ਨੀਆਂ ਨੂੰ ਅਸੀਂ ਜਗਾਣਾ।
ਹਨੇਰਾ ਦੂਰ ਭਜਾਓ ਪਾਪਾ ਜੀ!!

ਪ੍ਰਦੂਸ਼ਣ ਦਾ ਕਰੋ ਖਾਤਮਾ।
ਸਭ ਦੀ ਸੁਖੀ ਰਹੂ ਆਤਮਾਂ।
ਪਟਾਕੇ ਨਹੀਂ ਚਲਾਓ ਪਾਪਾ ਜੀ!!

ਘਰ ਵਿੱਚ ਸਾਫ-ਸਫਾਈ ਕਰਕੇ।
ਚਾਰ-ਚੁਫੇਰਾ ਰੌਸ਼ਨ ਕਰਕੇ।
ਗ਼ਮ ਨੂੰ ਮਨੋ ਭੁਲਾਓ ਪਾਪਾ ਜੀ!!

ਪਰਮ-ਪਵਿੱਤਰ ਸ਼ੁਭ ਦਿਹਾੜਾ।
ਰੌਸ਼ਨੀਆਂ ਦਾ ਕਰੇ ਪਸਾਰਾ।
ਦੂਈ-ਦਵੈਤ ਮੁਕਾਓ ਪਾਪਾ ਜੀ!!