Omkar Sood – Baddal aaye

ਬੱਦਲ ਆਏ-ਬੱਦਲ ਆਏ।
ਚਿੱਟੇ ਕਾਲੇ ਬੱਦਲ ਆਏ।
ਸ਼ੇਰਾਂ ਵਾਂਗੂੰ ਗਰਜਣਗੇ।
ਛਮ-ਛਮ ਪਾਣੀ ਬਰਸਣਗੇ।
ਗਰਜਣ ਪਿੱਛੋਂ ਬਿਜਲੀ ਲਿਸ਼ਕੂ।
ਉਦੋਂ ਸਾਡੀ ਜਾਨ ਵੀ ਪਿਚਕੂ।
ਡਰ ਭੈਅ ਸਾਰਾ ਦੂਰ ਭਜਾ ਕੇ।
ਐਨੀ ਸਾਰੀ ਖੁਸ਼ੀ ਮਨਾ ਕੇ।
ਮੀਂਹ ਦੇ ਵਿੱਚ ਨਹਾਵਾਂਗੇ।
ਗਰਮੀ ਦੂਰ ਭਜਾਵਾਂਗੇ।
ਰੁੜ੍ਹਦੇ ਪਾਣੀ ਦੇ ਵਿੱਚ ਖੜ੍ਹਕੇ।
ਨਹਾ ਲੈਣਾ ਹੋ ਕੇ ਬੇ-ਧੜਕੇ।
ਲੈ ਕੇ ਕਾਗਜ ਦੀ ਇੱਕ ਕਿਸ਼ਤੀ।
ਚਿੱਟੀ-ਨੀਲੀ ਬਹੁਤ ਹੀ ਸਸਤੀ।
ਪਾਣੀ ਵਿੱਚ ਵਹਾ ਦੇਵਾਂਗੇ।
ਨਾਲੇ ਸ਼ੋਰ ਮਚਾ ਦੇਵਾਂਗੇ।
ਦੇਖੋ ਸਾਡੀ ਕਿਸ਼ਤੀ ਜਾਂਦੀ।
ਪਾਣੀ ਦੇ ਵਿੱਚ ਗੋਤੇ ਖਾਂਦੀ।
ਲਾਈਨਾ ਦੇ ਵਿੱਚ ਲੱਗੀ ਜਾਓ।
ਆ ਕੇ ਯਾਰੋ ਟਿਕਟ ਕਟਾਓ।
ਮਸਤੀ ਦੇ ਨਾਲ ਇਸ ਵਿੱਚ ਬਹਿ ਕੇ।
‘ਹਿੱਪ-ਹਿੱਪ-ਹੁਰੇ’ ਕਹਿ ਕੇ।
ਨਾਲੇ ਮੀਂਹ ਦੇ ਵਿੱਚ ਨਹਾਓ।
ਖੁਸ਼ੀਆਂ ਦੀ ਸੌਗਾਤ ਵੀ ਪਾਓ।
ਹੱਸੋ-ਟੱਪੋ ਖੁਸ਼ੀ ਮਨਾਓ।
ਏਕੇ ਵਾਲਾ ਗੀਤ ਸੁਣਾਓ।
ਪਿਆਰਾਂ ਵਾਲੀ ਰੀਤ ਚਲਾਓ।
ਨਫ਼ਰਤ ਕੋਲੋਂ ਬਚੋ ਬਚਾਓ।
ਕੱਢ ਕੇ ਸਾਰੀ ਮਨ ਦੀ ਗਰਮੀ।
ਬਣ ‘ਜੋ ਸਾਰੇ ਮਾਨਵ ਧਰਮੀ।
ਕਣੀਆਂ ਦੇ ਵਿੱਚ ਖੂਬ ਨਹਾਓ।
ਨਾਲੇ ਮੀਂਹ ਦਾ ਸ਼ੁਕਰ ਮਨਾਓ।