Omkar Sood – Baingan

ਆਇਰਨ ਦੇ ਨਾਲ ਭਰਿਆ ਬੈਂਗਣ।
ਰਹਿੰਦਾ ਡਰਿਆ-ਡਰਿਆ ਬੈਂਗਣ।
ਰੰਗ ਜਾਮਨੀ-ਟੋਪੀ ਹਰੀਅਲ,
ਗੁੱਦੇ ਦੇ ਨਾਲ ਭਰਿਆ ਬੈਂਗਣ।
ਪਤਾ ਨਹੀਂ ਕਦ ਭੁੜਤਾ ਬਣ ਜਾਏ,
ਅੱਜ ਮਰਿਆ ਕੱਲ ਮਰਿਆ ਬੈਂਗਣ।
ਸੈਆਂ ਇਸ ਦੀਆਂ ਦੇਸੀ ਨਸਲਾਂ,
ਨਸਲਾਂ ਦੇ ਨਾਲ ਭਰਿਆ ਬੈਂਗਣ।
ਪਿਓਂਦ ਚਾੜ੍ਹਕੇ ਬੀ.ਟੀ ਕੀਤਾ,
ਭਾਰਤ ਵੱਲ ਨੂੰ ਤੁਰਿਆ ਬੈਂਗਣ।
ਬੀ.ਟੀ. ਮਤਲਬ ਬਰੀਡ-ਟਰਾਂਸਲੇਟ,
ਸੁਘੜ ਵਿਗਿਆਨੀਆਂ ਕਰਿਆ ਬੈਗਣ।
ਕਹਿੰਦੇ ਨਾ ਹੀ ਆਵੇ ਬੀ.ਟੀ.,
ਔਗੁਣਾ ਦੇ ਨਾਲ ਭਰਿਆ ਬੈਂਗਣ।
ਨਿੱਕਾ-ਲੰਮਾਂ ਗੋਲ ਤੇ ਵੱਡਾ,
ਪਿਆ ਮੰਡੀਆਂ ਵਿੱਚ ਭਰਿਆ ਬੈਂਗਣ।
ਪੇਟਾਂ ਦੇ ਵਿੱਚ ਗੈਸ ਬਣਾਵੇ,
ਜਦ ਪੇਟਾਂ ਵਿੱਚ ਵੜਿਆ ਬੈਂਗਣ।
ਫਿਰ ਵੀ ਇਸ ਨੂੰ ਖਾਈ ਜਾਂਦੇ,
ਕਿਉਂਕਿ ਆਇਰਨ ਭਰਿਆ ਬੈਂਗਣ।