Omkar Sood – Dhartian te paanian di thod hai

ਧਰਤੀਆਂ ‘ਤੇ ਪਾਣੀਆਂ ਦੀ ਥੋੜ੍ਹ ਹੈ।
ਬਾਰਸ਼ਾਂ ਮਰ ਜਾਣੀਆਂ ਦੀ ਲੋੜ ਹੈ।

ਹੱਸ-ਖੇਡ ਚਾਰ ਦਿਨ ਬਿਤਾਉਣ ਲਈ,
ਹਾਣੀਆਂ ਨੂੰ ਹਾਣੀਆਂ ਦੀ ਲੋੜ ਹੈ।

ਘਰ ਦੀਆਂ ਜੋ ਸਾਂਭ ਸਕਣ ਚਾਬੀਆਂ,
ਐਸੀਆਂ ਸੁਆਣੀਆਂ ਦੀ ਲੋੜ ਹੈ।

ਜੋ ਉਠਾਲ ਸਕਣ ਮੋਈ ਸੋਚ ਨੂੰ,
ਜ਼ੋਰਦਾਰ ਕਹਾਣੀਆਂ ਦੀ ਲੋੜ ਹੈ।

ਦਾਦੀਆਂ ਤੇ ਨਾਨੀਆਂ ਜੋ ਕਹਿ ਗਈਆਂ,
ਐਸੇ ਕਿੱਸੇ-ਘਾਣੀਆਂ ਦੀ ਲੋੜ ਹੈ।

ਭੁੱਲ ਗਏ ਹਾਂ ਦੁੱਧ ਹੱਥੀਂ ਰਿੜਕਣਾ,
ਚਾਟੀਆਂ-ਮਧਾਣੀਆਂ ਦੀ ਲੋੜ ਹੈ।

ਕੁੱਖ ਵਿੱਚ ਨਾ ਕਤਲ ਕਰ ਬਹੋਨਿਆ,
ਧੀਆਂ-ਧਿਆਣੀਆਂ ਦੀ ਲੋੜ ਹੈ।