Omkar Sood – Phull

ਫੁੱਲਾ ਵੇ ਤੇਰੀਆਂ ਪੱਤੀਆਂ,
ਪੱਤੀਆਂ ਰੰਗ-ਰੱਤੀਆਂ,
ਹਰ ਰੰਗ ਬਿਖਰਦਾ!

ਫੁੱਲਾ ਤੇਰੀ ਮਹਿਕ ਵੇ,
ਦਿਲ ਨੂੰ ਟਹਿਕ ਵੇ,
ਦਿਲ ਡਾਢਾ ਠਰਦਾ!

ਫੁੱਲਾ ਤੇਰੇ ਰੰਗ ਵੇ,
ਮਨ ਨੂੰ ਦੇਣ ਉਮੰਗ ਵੇ,
ਤੂੰ ਮੰਦਰੀਂ ਚੜ੍ਹਦਾ!

ਫੁੱਲਾ ਤੇਰਾ ਹੱਸਣਾ,
ਹੱਸ ਕੇ ਮਨ ਵਿੱਚ ਵੱਸਣਾ,
ਮਨ ਅਸ਼-ਅਸ਼ ਕਰਦਾ!

ਫੁੱਲਾ ਤੂੰ ਭਾਂਤ-ਸਭਾਂਤ ਦਾ,
ਵੱਖਰੀ-ਵੱਖਰੀ ਜਾਤ ਦਾ,
ਕਦੇ ਨਾ ਲੜਦਾ!

ਫੁੱਲਾ ਤੂੰ ਹੀ ਤੂੰ ਹੈਂ,
ਭੰਵਰੇ ਦੀ ਤੂੰ ਰੂਹ ਹੈਂ,
ਜੋ ਭਰਮਣ ਕਰਦਾ!

ਫੁੱਲਾ ਤੂੰ ਭਗਵਾਨ ਹੈਂ,
ਸਿਜਦਾ ਹਰ ਇਨਸਾਨ ਹੈ,
ਪਿਆ ਤੈਨੂੰ ਕਰਦਾ!