Ajaib Chitrakar – Dharti Mata
ਇਹ ਧਰਤੀ ਸਾਡੀ ਮਾਤਾ ਹੈ,
ਅਸੀਂ ਇਹਦੇ ਪੁੱਤ ਦੁਲਾਰੇ ਹਾਂ ।
ਇਹ ਧਰਤੀ ਸਾਨੂੰ ਪਿਆਰੀ ਹੈ,
ਧਰਤੀ ਨੂੰ ਅਸੀਂ ਪਿਆਰੇ ਹਾਂ ।
ਸਾਨੂੰ ਪਿਆਰੀ ਦੇਸ਼ ਦੀ ਮਿੱਟੀ ਹੈ,
ਪਿਆਰਾ ਹਰ ਇਕ ਨਜ਼ਾਰਾ ਹੈ ।
ਤੇ ਪਿਆਰੀਆਂ ਇਹਦੀਆਂ ਫਸਲਾਂ ਨੇ,
ਫਸਲਾਂ ਦਾ ਰੂਪ ਪਿਆਰਾ ਹੈ ।
ਅਸੀਂ ਮਾਣਦੇ ਇਹਦੇ ਸੁਹਜਾਂ ਦੇ,
ਨਿੱਤ ਨਵਿਓਂ ਨਵੇਂ ਹੁਲਾਰੇ ਹਾਂ ।
ਇਹ ਧਰਤੀ ਸਾਨੂੰ ਪਿਆਰੀ ਹੈ,
ਧਰਤੀ ਨੂੰ ਅਸੀਂ ਪਿਆਰੇ ਹਾਂ ।
ਸਾਨੂੰ ਇਹਦੇ ਪਰਬਤ ਪਿਆਰੇ ਨੇ ।
ਤੇ ਇਹਦੇ ਦਰਿਆ ਪਿਆਰੇ ਨੇ ।
ਸਾਨੂੰ ਇਹਦੇ ਲੋਕੀ ਪਿਆਰੇ ਨੇ,
ਲੋਕਾਂ ਦੇ ਚਾਅ ਪਿਆਰੇ ਨੇ ।
ਅਸੀਂ ਮਾਣਦੇ ਇਹਦੀਆਂ ਰੁੱਤਾਂ ਦੇ,
ਖਿੜਦੇ ਹੋਏ ਰੰਗ ਨਜ਼ਾਰੇ ਹਾਂ ।
ਇਹ ਧਰਤੀ ਸਾਨੂੰ ਪਿਆਰੀ ਹੈ,
ਧਰਤੀ ਨੂੰ ਅਸੀਂ ਪਿਆਰੇ ਹਾਂ ।
ਸਾਨੂੰ ਇਹਦੇ ਪੰਛੀ ਪਿਆਰੇ ਨੇ,
ਉਹਨਾਂ ਦੇ ਚੋਲ੍ਹ ਪਿਆਰੇ ਨੇ ।
ਫੁੱਲਾਂ ਜਹੇ ਕੋਮਲ ਕੋਮਲ ਜੋ,
ਬਾਲਾਂ ਦੇ ਬੋਲ ਪਿਆਰੇ ਨੇ ।
ਅਸੀਂ ਇਸ ਦੀ ਰੀਝ ਦੇ ਅੰਬਰ ਦੇ,
ਜਗ ਮਗ ਕਰਦੇ ਹੋਏ ਤਾਰੇ ਹਾਂ ।
ਇਹ ਧਰਤੀ ਸਾਨੂੰ ਪਿਆਰੀ ਹੈ,
ਧਰਤੀ ਨੂੰ ਅਸੀਂ ਪਿਆਰੇ ਹਾਂ ।
ਲੂੰ ਲੂੰ ਦੇ ਵਿਚ ਹੈ ਪਿਆਰ ਇਦ੍ਹਾ,
ਇਸ ਨੂਰ ਕਈ ਉਪਜਾਏ ਨੇ ।
ਇਸ ਭਗਤ, ਬੀਰ ਤੇ ਦਾਤੇ ਕਈ,
ਅਪਣੀ ਕੁੱਖ ਵਿਚੋਂ ਜਾਏ ਨੇ ।
ਅਜ ਤੀਕ ਜਿਨ੍ਹਾਂ ਦੀ ਕਰਨੀ ਦੇ,
ਗੁਣ ਗਾਉਂਦੇ ਕਦੇ ਨਾ ਹਾਰੇ ਹਾਂ ।
ਇਹ ਧਰਤੀ ਸਾਨੂੰ ਪਿਆਰੀ ਹੈ,
ਧਰਤੀ ਨੂੰ ਅਸੀਂ ਪਿਆਰੇ ਹਾਂ ।
