Ashraf Gill – Jeewan ik kitaab jivein


ਜੀਵਨ ਇਕ ਕਿਤਾਬ ਜਿਵੇਂ

ਜੀਵਨ ਇਕ ਕਿਤਾਬ ਜਿਵੇਂ,
ਦੁਖ ਸੁਖ ਦੇ ਦੋ ਬਾਬ ਜਿਵੇਂ ।

ਜਾਗਣ ਵੇਲ਼ੇ ਖ਼ਾਹਸ਼ਾਂ ਇੰਜ,
ਨੀਦਰ ਅੰਦਰ ਖ਼ਾਬ ਜਿਵੇਂ ।

ਹਸਦੈ ਪਿਆ ਸਵਾਲਾਂ ਤੇ,
ਦੇਂਦੈ ਪਿਆ ਜਵਾਬ ਜਿਵੇਂ ।

ਨਿਤ ਦਿਨ ਖੁੱਭੀ ਜਾਨੇਂ ਹਾਂ,
ਇਹ ਦੁਨੀਆਂ ਏਂ ਗਾਬ ਜਿਵੇਂ ।

ਰਹਿਤਲ਼ ਅਪਣੀ ਦੁਨੀਆਂ ਵਿਚ,
ਕੰਡਿਆਂ ਵਿਚ ਗੁਲਾਬ ਜਿਵੇਂ ।

ਇੰਜੇ ਬੇ-ਇਤਬਾਰੈ ਓਹ,
ਅਮਰੀਕਾ ਦੀ ਜਾਬ ਜਿਵੇਂ ।

ਆ ਏਵੇਂ ਘੁਲ਼ ਮਿਲ਼ ਜਾਈਏ,
ਰਾਵੀ ਵਿਚ ‘ਚਨਾਬ’ ਜਿਵੇਂ ।

ਹੋਰਾਂ ਖਿੱਚ ਅਮਰੀਕਾ ਇੰਜ,
ਸਾਨੂੰ ਸਿੱਕ ‘ਪੰਜਾਬ’ ਜਿਵੇਂ ।

‘ਅਸ਼ਰਫ਼’ ਅਸਲੀ ਜੀਵਨ ਏਹ,
ਦੇਣਾਂ ਰੋਜ਼ ਹਿਸਾਬ ਜਿਵੇਂ ।